Yupela Noken Karai
Yupela Noken Karai
Sunday, 25 April 2010 at 23:06
'Yupela Noken Karai' - Strongpla man igo long haus krai.
(Stori ikam long Oro Provins)
Wanpela bik man idai long peles na ol manmeri i kam bung long soim pes na soim sore na krai long turangu i dai pinis.
Bodi blong man i dai pinis em i silip insait long haus blong em yet na ol man oli kam insait long tok gutbai long em na karai liklik long sait long bodi blong en.
Olgeta samting i ron orait tasol - olsem i normal tasol.
Orait wanpela strongpela man tru i kam kamap long ples karai na em i laik igo insait long haus karai. Haus karai em sanap long pos igo antap na flua oli mekim long limbum. Stronpela man ia i kalap igo antap long lata na em i go instait long haus karai.
Bik man ia em i bilas long malo na em karim bilum blong em wantem sel kambang blong em yet na em igo insait long soim sore long bodi. Em stronpela man. Em i no save karai long taim ol man o meri indai. Em taim yumi ol narapela bai bagarap long krai, em man ia nogat. Em, ai blong em, bai nogat ai wara i kapsait.
Okay strongpela man ia igo insait long haus karai na i lukim poroman bilong em na - tru em ibin sore long poroman bilong em i lusim laif. Tasol, yu save em ino man bilong karai. Em i tokim ol man meri long haus krai:
'Ah, yupela noken karai. Em wanpela rot bilong yumi tasol ia. Yupela noken wari tumas, noken karai.'
Tasol turangu flua blong dispela haus em sampela limbum, em ol i no nilim igo daun. Em ol limbum oli silip lus wanwan na stap. So taim bikman igo sindaun, pastaim em i orait. Tasol bihain taim liklik, taim ol narapela i kam long karai na ol wokabaut antap long limbum, ol limbum ol i meknais (oli muv igo ikam) na turagu, hasua nau na tupela kiau bilong bikman ia ol i kamaut long malo na ol i hangamap igo aninit long haus karai.
Bikman ia imas em ino pilim taim tupela barata blong em ia oli hangamap igo daun pinis aninit long haus. Em strong istap: 'Mi tok ia... ino karai, em wanpela rot blo yumi olgeta ia...'
Kirap nogut, sampela nupela lain ikam insait long haus karai na limbum long flua i meknais gen.
Steret em tupela kiau bilong bikman ia em limbum i pasim tupela nau na em hat long kirap igo antap long steretim sindaun blong em yet. Em late nau. Ol tupela barata blong em ol i hangamap igo daun pinis na limbum i kam pasim ol pinis. Em hasua olgeta nau.
Ooh, pen bilong em i no isi. Em kik steret..! Yu save, kiau ia, pen bilong em ino save isi.
Ai bikman ya em kisim taim. Em painim rot steret. Em bai mekim wanem nau? Samting em yet rong na tokim ol man meri long noken karai. Em traim, traim long painim speis bilong stretim gen gutpela sindaun namel long ol tripela brata bilong em. Tasol i hat tumas.
Maski em kirap nau, em karai steret: 'Aiyo... gutpela brata blo mi ia, wai na yu kirap na yu indai go pinis...' Ayah... sore ia..!
Em karai tasol long sem taim em i putim han bilong em igo daun long flua namel long tupela lek blong em yet na em holim ol limbum. Em karai wantaim, na em putim force bilong em long opim gen ol tupela limbum we oli pasim ol kiau blong em. Em traim best olsem ol man meri bai ol i noken lukim wanem samting i kamap long em pinis. So em karai wantaim na struggle istap.
Turangu em tru tru, ai wara blong em i bin pundaun long dispela taim.
Em i bin kisim taim steret long traim long stretim gut gen malo bilong em. Bihain tasol nau em olsem, gutpela kol win i bin kisim em gen.
Tasol i luk olsem, em first taim blong em long dispela dei, we em i bin karai long wanpela man meri we i bin indai long peles.
Em Tasol.
Dispela stori em i ol pela stori tru. Mi bin harim long Port Moresby long 1980s. Ol fren blo mi yet long Popondetta oli ibin stori long mi. Man, mipela save indai steret taim mangi Popondetta Rodney Kove em yet save stori na ektim aut dispela stori.